地中海呢個夾喺歐、亞同非之間嘅內陸海，係唔少香港人嚮往嘅旅遊勝地，皆因呢度夏乾冬雨嘅氣候舒服，且陽光充足。一趟地中海郵輪之旅可以去齊意大利、希臘、土耳其等國睇古文明靚景、玩浮潛、食好嘢，真係諗起都嘆！但有冇諗過喺同一片海上，有更多人可能係喺絕望中浮沉？
🎵每天生還已是極難🎵......對於決定橫渡地中海去歐洲嘅移民、難民嚟講，呢句歌詞可能係佢哋嘅心聲——喺非洲、中東甚至亞洲嘅原藉國面對政局不穩，經濟同醫療又唔好，唔少人為咗逃避戰火、貧窮、飢餓、傳染病，決定冒險逃難到歐洲尋求更安穩嘅生活，甚至繼續支援遠方嘅屋企人。
移民路線海陸都有，但選擇橫渡地中海嘅人比較多。路線主要分西部（西班牙上岸）、中部（意大利上岸）同東部（希臘上岸），可惜嘅係每年唔少人都喺逃離嘅過程中消聲匿跡。單喺2023年，已有34萬移民難民嘗試渡海，當中超過 3,000 人失踪或死亡；三條路線中，更以主要喺利比亞同突尼斯出發嘅中部路線最危險，但仍然無阻呢班難民、移民嘅決心：2023年經地中海中部路線到達意大利嘅人數，比往年增長超過一倍！
以經利比亞為例，難民喺去到地中海海岸前要先捱得過 1,000 公里嘅沙漠路途，過咗沙漠，好多難民要留喺由武裝分子營運嘅拘留中心，被逼做苦工直至儲夠錢先可以出發去歐洲，拘留所環境惡劣，虐打、性暴力每日上演。即使上到船，由利比亞去到西西里嘅 500 公里海路變幻莫測，佢哋嘅偷渡船大多係嚴重超載嘅橡皮艇或木船，令呢段路更加危險重重。呢段路嘅危險程度隨住航道、蛇頭、季節變化都有唔同，但唯一肯定嘅係呢啲船上冇足夠嘅食物同水、冇導航，加上唔少難民本身都已經身體虛弱、患上營養不良。一旦偏離航道，原本大約 2-6 日嘅航程就要一再延長，對身處茫茫大海中嘅難民嚟講，身心都極度煎熬。
無國界醫生自 2015 年起，先後喺八艘搜救船上展開搜救行動，救起超過 92,000人。而由2021年5月起，我哋就獨自租用搜救船 Geo Barents展開搜救行動。呢9年來，我哋一直堅持喺海上拯救生命。夏季天氣已係最有利移民、難民展開呢段危險旅途，所以海上移民嘅高峰期即將來。適逢 6 月 20 日係國際難民日，請大家更多關注非洲海上難民面臨緊嘅人道危機，促使歐盟成員國改變移民政策，唔好畀制度凌駕喺人權同生命之上，盡力保障移民同難民嘅人身安全。
#地中海 #地中海中部 #海上移民 #難民 #利比亞 #突尼西亞 #去到咁Pin
